0
باخیش
چهارشنبه 8 شهریور 1391
پیشیك له رین تانری سی
بؤلوم | یازار : ماكولو هاراي

پیشیك له رین تانری سی
نوشته شده توسط بهزاد آزرمی   

اوشاق لار كیلاسی نین ان ایستعدادلی و چوخ سئودییم اوشاق لاریندان بیری سی گوزل قیزیمیز شبنم ایدی. او منیم كیلاسیمدا اولدوغو واخت 11-12 یاش لاریندا و بئشینجی كیلاس دا اوخویوردو. سون درجه ایستعدادلی و چالیشقان قیزا گله جك ده چوخ اومودوم واردی. آمما تاسوفله آمان سیز اولوم بو گوزل بالانی چوخ كیچیك یاش لاریندا آرامیزدان آییردی. شبنم كیلاس لاریمیزدا بیر ناغیل دا یازمیشدی، بلكه اوخودوغو، ائشیتدییی و یا گوردویو بیر حئكایه دن ایلهام لانمیشدی، آمما ساده و اوز اوشاق دیلی ایله یازدیغی اوچون او قدر سئومیشدیم كی، اونو او واخت لار حاضیرلادیغیم درسلیك ده گتیرمیشدیم. او درسلیك له ره باخاركن شبنم‏ی خاطیرلادیم و اونون عزیز یاد و خاطیره سی اوچون اونون یازدیغی حئكایه نی بورادا وئرمك ایسته دیم. روحون شاد اولسون عزیز شبنم.  پیشیك له رین تانری سیبیری وار ایدی، بیری یوخ ایدی. گویون آلتیندا، یئرین اوستونده بیر بالاجا ائوده سگیز باجی وار ایدی. قیزلارین آتاسی چیلله گئجه سی اوچون ات آلمیشدی. قیزلاردان بیری نین گویلونه یامان كاباب دوشموشدو. او آتا – آناسی و باجی لارینین گوزوندن اوزاق ات‏دن بیر آزینی كه سیب، كاباب ائله ییب، یئدی.قیزلارین آتاسی كی اتی آزالمیش گوردو، قیزلاریندان "قیزلاریم! سیزلردن هانكی نیز ات‏دن یئییب دیر؟" – دئیه سوروشدو.قیزلارین هئچ بیری دینمه دی. اتی یئین قیز ایسه دوروب آتاسینا دئدی: "من فیكر ائلیرم اونو پیشیك یئییب دیر."آتاسی كی بیلیردی پیشیك پیچاق اله آلا بیلمز فیكره گئدیب اوز – اوزونه دئدی: من گه رك اتی یئیه نی تاپام.آتا پیشیك شكلینده بیر میجسمه آلدی. اونون اوستونو قارا بویا ایله بویادی. سونرا اونو قیزلارینا گورسه دیب دئدی: "بو پیشیك له رین تانری سی دیر. او دئییر كی پیشیك لر اتی یئمه ییب لر، قیزلاردان بیری اتی یئییب. بو قیزلار گه رك تك – تك اوتاغا گه لیب ال له رینی مه نیم اوستومه چكسینلر. هانكی سی الینی مه نیم اوستومه چه كركن مییولداسام اتی یئین اودور.قیزلار بیر – بیر اوتاغا گئدیب ال له رینی پیشییین اوستونه چكدیلر. آمما اتی یئین قیز اوز – اوزونه دئدی: "من الیمی پیشییین اوستونه چكمه رم تا او دا مییولداماسین." قیز الینی پیشییین اوستونه چكمه ییب، اوتاق دان چیخدی.قیزلارین آتاسی اونلارین الینه باخیب بیریندن سونرا هامی سینین الینی بویالی گوردو. آتا اتی یئین قیزا باخیب: "هه، اتی سن یئییب سن" – دئدی.قیزجیغاز اوتانجاق آتاسی نین اوزونه باخیب گولومسه دی. آتا دا اونون گوزل گولوشو اوچون بیله سینی باغیشلادی.