چال عاشیق

چال عاشیق سازینی، اوره گیم دولوب
بعضا اینسان ایچون درمان بو اولور
سازین نغمه لری آخسین كونلومه
یوخسا چیچكلریم عطش دن سولور

چال عاشیق سازینی، بلكه سازیندا
اومودسوز حیاتا بیر اومید تاپیم
گل عاشیق سازیندا صبردن دانیش
بلكه دؤزمك درسین آغزیندان قاپیم

بیلیرسن آی عاشیق دردیمیز بیردیر
گل گئدك سازیندا عشق دن دانیش
سیم لرین دیلی ایله خلقی هارایلا
گل بو درده منله بیرلیكده یانیش

گل عاشیق بو آخشام داغلار باشیندا
نغمه لر سؤیله یك گوزللر ایچون
گل عاشیق بو آخشام عاشیق اولانا
دئیه ك غم چكمه یین دولدوروب ایچون

سحره جك چالیب، اوخویاق عاشیق!
بلكه اوره كده كی یارا بیتیش سین
چاخیرلاشیب چالاق اوجا سس ایله
قوی عاشیق سسیمیز یارا یئتیش سین

اولدوزلارلا اولاق بو گئجه همدم
اولكردن گل آلاق عشق الهامینی
بو گئجه چاغیراق تام عاشیقلاری
چاخیرا، چالقییا ییغاق هامینی

اینسان دردلرینی گل سازیندا چال
دوزوملی عاشیق لاردان حكایت ائت
گل، بیزه آی عاشیق عشق درسی وئر
اومیدسیز ساعاتدا دردیمیزه یئت

علیرضا ناب دل ( اوختای)