بیلمه دیز هئچ – هوشنگ جعفری

(هیچ نفهمیدید – شعری از هوشنگ جعفری)

گئجه تا صبح آچیلینجا مه له دیم بیلمه دیز هئچ
اوره گین قانینی گؤزدن اله دیم بیلمه دیز هئچ
گون چیخان واختا ییغیشدیز بیر آغاج كؤلگه سینه
اویدوز اول ده اورك دن قارا بایقوش سه سینه
اویانان اولمادی بیر كیمسه آغاج شیهه سینه
نه یوخو لئش لئشین اوست ه ن كله دیم بیلمه دیز هئچ
قوللاریزدان یاپیشیب سیلكه له دیم بیلمه دیز هئچ
اؤزگه بیر ائل جه بیله نلر كؤكوزو قازدیردی
سئشدی املیك لریزی آیری یولا آزدیردی
اؤز دیلینده سیزه اؤز ایسته دیغین یازدیردی
آغلادیم من اوزوزه یاش چیله دیم بیلمه دیز هئچ
قوللاریزدان یاپیشیب سیلكه له دیم بیلمه دیز هئچ
سارالیب سولدولا سینه مده بوتون آرزولاریم
بارماغیم دویدو دیلیم سوسدو دیله گلدی تاریم
قیشقیران بیر منیدیم بیرده منیم یازقیلاریم
من چیغیردیم اوزوزه یاش چیله دیم بیلمه دیز هئچ
قوللاریزدان یاپیشیب سیلكه له دیم بیلمه دیز هئچ
ایندی دای كند داغیلیب باغ پوزولان واخدی اویان
گؤزله ییردیم بو مین ایللیك یوخودان بلكی دویان
 زنجان آدین قیزیل آذر ائلینین اوسته قویان
یوخودایدیز سیزی آشدیم بله دیم بیلمه دیز هئچ
قوللاریزدان یاپیشیب سیلكه له دیم بیلمه دیز هئچ
آیری بیر كؤكده بیتن گوندن اصالت چورودو
ایندی ساتقین لاریمیز هر كوچه ده مین سورودو
دیلیمیز اولدو یاساق اؤلكه نی نیسگیل بورودو
صور اسرافیلی مین یول پیله دیم بیلمه دیز هئچ
قوللاریزدان یاپیشیب سیلكه له دیم بیلمه دیز هئچ

ترجمه به فارسی:

شب تا سحر آه و ناله كردم نفهمیدید
خون دل از چشمانم روان شد نفهمیدید