باخیش
چهارشنبه 8 شهریور 1391
بؤلوم | یازار : ماكولو هاراي

پيشيك له رين تانري سي
نوشته شده توسط بهزاد آزرمي   

اوشاق لار كيلاسي نين ان ايستعدادلي و چوخ سئودييم اوشاق لاريندان بيري سي گوزل قيزيميز شبنم ايدي. او منيم كيلاسيمدا اولدوغو واخت 11-12 ياش لاريندا و بئشينجي كيلاس دا اوخويوردو. سون درجه ايستعدادلي و چاليشقان قيزا گله جك ده چوخ اومودوم واردي. آمما تاسوفله آمان سيز اولوم بو گوزل بالاني چوخ كيچيك ياش لاريندا آراميزدان آييردي. شبنم كيلاس لاريميزدا بير ناغيل دا يازميشدي، بلكه اوخودوغو، ائشيتدييي و يا گوردويو بير حئكايه دن ايلهام لانميشدي، آمما ساده و اوز اوشاق ديلي ايله يازديغي اوچون او قدر سئوميشديم كي، اونو او واخت لار حاضيرلاديغيم درسليك ده گتيرميشديم. او درسليك له ره باخاركن شبنم‏ي خاطيرلاديم و اونون عزيز ياد و خاطيره سي اوچون اونون يازديغي حئكايه ني بورادا وئرمك ايسته ديم. روحون شاد اولسون عزيز شبنم.  پيشيك له رين تانري سيبيري وار ايدي، بيري يوخ ايدي. گويون آلتيندا، يئرين اوستونده بير بالاجا ائوده سگيز باجي وار ايدي. قيزلارين آتاسي چيلله گئجه سي اوچون ات آلميشدي. قيزلاردان بيري نين گويلونه يامان كاباب دوشموشدو. او آتا – آناسي و باجي لارينين گوزوندن اوزاق ات‏دن بير آزيني كه سيب، كاباب ائله ييب، يئدي.قيزلارين آتاسي كي اتي آزالميش گوردو، قيزلاريندان "قيزلاريم! سيزلردن هانكي نيز ات‏دن يئييب دير؟" – دئيه سوروشدو.قيزلارين هئچ بيري دينمه دي. اتي يئين قيز ايسه دوروب آتاسينا دئدي: "من فيكر ائليرم اونو پيشيك يئييب دير."آتاسي كي بيليردي پيشيك پيچاق اله آلا بيلمز فيكره گئديب اوز – اوزونه دئدي: من گه رك اتي يئيه ني تاپام.آتا پيشيك شكلينده بير ميجسمه آلدي. اونون اوستونو قارا بويا ايله بويادي. سونرا اونو قيزلارينا گورسه ديب دئدي: "بو پيشيك له رين تانري سي دير. او دئيير كي پيشيك لر اتي يئمه ييب لر، قيزلاردان بيري اتي يئييب. بو قيزلار گه رك تك – تك اوتاغا گه ليب ال له ريني مه نيم اوستومه چكسينلر. هانكي سي اليني مه نيم اوستومه چه كركن مييولداسام اتي يئين اودور.قيزلار بير – بير اوتاغا گئديب ال له ريني پيشييين اوستونه چكديلر. آمما اتي يئين قيز اوز – اوزونه دئدي: "من اليمي پيشييين اوستونه چكمه رم تا او دا مييولداماسين." قيز اليني پيشييين اوستونه چكمه ييب، اوتاق دان چيخدي.قيزلارين آتاسي اونلارين الينه باخيب بيريندن سونرا هامي سينين اليني بويالي گوردو. آتا اتي يئين قيزا باخيب: "هه، اتي سن يئييب سن" – دئدي.قيزجيغاز اوتانجاق آتاسي نين اوزونه باخيب گولومسه دي. آتا دا اونون گوزل گولوشو اوچون بيله سيني باغيشلادي.