بایاتی‌لار

عزیزینم قار، قالار
ساوالان‌دا قار، قالار
بولبول كؤچوب باغ‌لاردان
یئرین آلیب قارقالار

آشیغام درنده گول
گؤزله وئرنده گول
مردی گؤرنده آغلا
نامردی گؤرنده گول

عزیزینم بوشقابا
هئیوانی دوز بوشقابا
یوخسولو كیم یوخلایار
قاشیق دَیمز بوش قابا

من آشیغام گوله نه
بولبوله نه، گوله نه
دئسین‌لر غمی یوخدو
قوشولموشام گولنه

عزیزیم او باهاردا
او یایدا، او باهاردا
ائل كوچدو دالی قالدیم
بیلمیرم اوبا هاردا

من آشیغام قورونا
قوروق اولوب قورونا
نامرد بیر اود یاندیردی
من بوروندوم قورونا

من آشیق قار، قالانیب
قار یاغیب، قار، قالانیب
نه اولوب بو داغلارا
كهلیك‌لر قارقالانیب

عزیزینم آل ایشیق
آلووومدان آل ایشیق
دردلی‌لر یانماق اوچون
آلیر من‌دن آلیشیق

آشیق اوو، ساری گئدك
گئدك اوو، ساری گئدك
اصلی كؤچوب بو یورددان
یاپیش اوساری گئدك

من آشیق اَی ایلمه‌یی
وور ناققیش اَی ایلمه‌یی
مرد اوغلو مرد گؤتورمز
نامرده اَییلمه‌یی

سید رضا بنی‌فاطمه (داغلی)