باخیش

بير بت مه پيكري


آه كي، گؤردوم گئنه بير بت مه پيكري،

مو- كمر و غنچه لب، گول رخ و شوخ– منظري

بير صنمي شوخ و شنگ، سيم– بر و لاله رنگ،

زولف سياهين گؤرن ناره ياخار عنبري

نافه‌ي آهوي چين سنده دير، اي نازنين،

باد صبا تك عبث ائتمه مني سرسري

گئتدي اليمدن، اينان، ساقي، آماندير، آمان،

باغريمي قان ائيلمه، وئر منه اول ساغري!

هيكل جان دير بوس اؤز حيرض يماني كيمي،

سانما كي، افسانه دير، حفظ ائله بو گؤوهري

كؤنلومون آيينه سي ژنگ غم آلميش گئنه،

دور، سني تاري، گتير نسخه‌ي اسگندري

پرده اوزوندن اگر سالسا منيم ديلبريم،

ترك قيلر بت پرست بتكده‌ي آذري

جام مئي عشقدن دايم اولور بي نصيب،

اولمايا تا عاشيقين مشقي روخ ديلبري

مات قالير متصل بادييه‌يي تيهده،

اولمايا تا ساليكين خيضر كيمي رهبري

كاغذ زركش گتير، وئر منه زرين قلم،

تا كي، من انشاء قيليم عشقده بو محضري

چونكي تامام ائيله‌ديم من بو طربخانه‌ني،

حاضر ائدين سيز او دم ماني‌يي صورتگري

اوندا منيم شكليمي، صورت ديلداريمي،

نقش ائده بو صفحه ده، شاد ائده بو كافري

گئتدي نباتي اؤزو، قالدي سؤزو يادگار،

عاشيق اولانلار گزر، آختاري بو دفتري

سيّد ابوالقاسم نباتي