یئددى توركجه شئعر مرضیه اسكوئی دن

بیر: دالغا- Dalqa _ موج: ٥٢ نجی پاییز
----------------------------------------------------
خیرداجا, ایشجه آرخیدیم Xırdaca işcə arxıdım
مئشهلردن, داغلاردان Meşələrdən dağlardan
درهلردن آخیردیم Dərələrdən axırdım
بیلیردیم دورقون سولار Bilirdim durqun sular
اؤز ایچینده بوغولار Öz içində boğular
بیلیردیم دریالاردا Bilirdim dəryalarda
دالغالار قوجاغیندا Dalqalar qucaöında
خیرداجا آرخلار اوچون Xirdaca arxlar üçün
یئنی حیات دوغولار Yeni həyat doğular
نه یولون اوزاقلیغی Nə yolun uzaqlığı
نه قارانلیق چوخورلار Nə qaranlıq çuxurlar
نه دورقونلوق هوسی Nə durqunluq həvəsi
منی یولدان قویمادی Məni yoldan qoymadı
ایندی قاریشمشام من İndi qarışmışam mən
قورتولماز دالغالارا Qurtulmaz dalqalara
وارلیغیمیز چالیشماق Varlığımız çalışmaq
یوخلوغوموز دایانماق Yoxluğumuz dayanmaq

آشاغیداكى قوشوقلار "عصر عمل" ٬ سایى ٤ ٬ ١٣٥٥ ایلیندن آلینیبدیر.

ایكى: پاییز ٥٠
----------------------------------------------------
هر سحر باخیرام "دماوند"ه من
قوجا داغ ووقارلا یاتیب دوروب
بیلمیره م نه واختدان٬ هانسى زاماندان
كؤهنه لمز٬ آغ٬ تمیز چادیرین قوروب
گاهدان زیروه سینه گونش ساچیلیر
گاهدان دا دومانلار دؤوره لیر اونو
نه یئللر٬ نه سئللر كیچیلدیر جانین
داشداندیر سینه سى٬ قارداندیر دونو
آغ باشى بنزه ییر " آرش" باشینا
"كاوه"نین٬ "ضحاك"ین اوندا ایزى وار
یئنى "ضحاك"لارا كؤهنه تاریخدن
خالقین كینه سیندن آیدین سؤزو وار
هر زامان باخاندا "دماوند"ه من
دایاغیم چوخالیر٬ كینه م درینلیر
"ضحاك"ى گؤروره م٬ كؤنلوم اودلانیر
"كاوه"نى یادلیرام٬ باغریم سرینلیر

اوچ: به اشرف قهرمان كه كودكان را عاشقانه دوست دارد:
----------------------------------------------------
قاپىدا دایانیب بیر چوپور افسر
كارتلاریمیزا باخیر٬ ایچه رى قویور
گؤزلرى قیزاریب٬ آغزى كف له نیب
حیرص٬ اونا باخاندا آدامى بوغور
بیر الینده باتوم٬ بیرینده بىسیم
بیر اوجدان باغیریر٬ دؤیور٬ ساواشیر
همقاتارلارى دا٬ دوروبلار اوردا
هامىسىنا گؤزه تچىلیك یاراشیر
قویونو سورودن آییران كیمى
هر كسى ایسته ییر آپاریر اونلار
اوشاقلار دایانیب قاپى اؤنونده
نیگاران باخیشلار٬ قاینایان قانلار
بیر قیز یولدان گلیر٬ یامان تله سیر
قاباغین كسیرلر: كارتیزى وئرین!
قیز دایانیر٬ قورخمور٬ دیك باخیر اونا
گؤرونور٬ بیلیرى شهامت یئرین
"سنین نه حاققین وار یولو كسه سن؟"
؟؟؟؟؟؟؟؟؟؟؟؟ (بو میصراع دوشوبدور)
؟؟؟؟؟؟؟؟؟؟؟؟ (بو میصراع دوشوبدور)
؟؟؟؟؟؟؟؟؟؟؟؟ (بو میصراع دوشوبدور)
قاباغین آلانمیر او یورغون افسر
قیز اؤزون قورتاریر٬ یولونا گئدیر
باخیشلار اوخشاییر بو قورخمازلیغى
هر كس اونو گؤرور٬ برك آلقیش ائدیر
یامان توخونورو بو ایش افسره
وارلیغى بنزه ین گؤزه تچى ایته
نیفرت گؤزه تچىسى٬ زور گؤزه تچىسى
آناسى اوتانیر وئردییى سوته
باخیشلار آلتیندا آیدین ازیلیر
درین نیفرتلرى قانیر٬ كیچیلیر
بیر گون خالقین اوغلو٬ سئویملىسى ایمیش
ایندى زور گؤزله ییر٬ خالقدان سئچیلیر
گلیرم كیلاسا٬ باشیم آشاغى
اوره ییم توتولوب٬ بدنیم اسیر
ائله توتقونام كى دولو بولوت تك

كینه٬ ناچار دؤزوم باغریمى كسیر
اوستاد ایفاده ایله كیتابدان اوخور
اوشاقلار هامىسى تئز تئز یازیرلار
ائله هئچ زادى گؤرمه ییب اونلار
قلمنن سوكوتون جانین پوزورلار
دییه سن حاققىیمیش زور دئسین افسر
دییه سن كیچیلمك اونلارا٬ خوشدور
كیمسه نى سیندیریر بیر اَیرى باخیش
كیمىنه یامان دا٬ تپیك ده نوشدور
كیچیك اوشاقلارا "تئست" یازیرلار:
بارماغیوى كسرسن٬ نئیله یه جكسن؟

؟؟؟؟؟؟؟؟؟؟؟؟ (بو میصراع دوشوبدور)
توپووو ایتیرسن٬ نئیله یه جكسن؟
گؤزلریم قارالیر٬ كؤنلوم سیخیلیر
آخى بئله سؤزلر نه ایش وئره جك؟
كیمسه دوشونور كى٬ آج اوشاقلاردان
كیم بئله یاوا سؤزلرى سئوه جك؟
چیلپاق آیاقلارا٬ آج قارینلارا
توپدان دانیشماغین معناسى یوخدور
ایشدن باش آچمیرلار اویناماق اوچون
سوروشمالى دردلر اونلاردا چوخدور
هانسى توپو وار كى ایتیرسین اونو؟
آج آج ایشله مكدن گلیبلر جانا
اللرى كسیلیر دفه دؤیمكدن
بارماقدان نئجه من دانیشیم اونا؟
قوى اوستاد دئسین كى پیس موعللیمم
من اونون سؤزلرین قانا بیلمیره م
آمریكائى اوستاد سئومه سین منى
اوشاقلارین عئشقىنى دانا بیلمیره م
دردیمیز بیر دئییل٬ ساوادیمیز دا
او اؤرگه دن سؤزلر دردیمه دَیمز
قورخمورام نومره مى آز وئرسین اوستا
نومره نین آزلیغى٬ باشیمى اَیمز
آمما قورخورام كى یوخسول اوشاقلار
بو سؤزلره گؤره منى آتسینلار
"نرگیس"ین٬ "سالمان"ین یورغون گؤزلرى
من بئله دانیشام٬ یاشا باتسینلار
اوشاقلار قورخمایین٬ یادیمداسیز سیز
هئچ زامان سیزلرى اونودمامیشام
گله جه یم گئنه سیزین یانیزا
دالغین كینه لرده قاناد یوموشام
سیزه بئله یاوا دانیشمارام من
كسیلن بارماغى هر گون گؤرورسوز
سوروشماق ایسته میر كرگاه دالیندا
بارماق كسیلنده٬ قانین سورورسوز
سیزه بئله سؤزلر هئچ لازیم دئییل
كسمه لى اللردن دانیشاجاغام
اویناتمالى توپدان نه قانیرسیز سیز؟
دانیشسام اوره كدن آلیشاجاغام
كیم سیزه توپ آلیب٬ اویناتماق اوچون؟
كیم قویوب گئده سیز توپ اویناماغا؟
اربابلار آللاهى یارادیب سیزه
ظولوم قازانلاریندا قایناماغا
آنجاق توپدان گره ك دانیشام سیزه
اویناتمالى توپلار ایشیزه گلمز
بؤیوكدور٬ پولاددیر من دانیشان توپ
اونون جانینى هئچ دفه ده دلمز
یاخچى ایشه سالساق پولاد توپلارى
ال كسن دفه لر مین پارچا اولار
بارماقلاریز توخدار٬ اللریز توخدار
اربابلار قالمازلار٬ كرگاهلار قالار
پولاد توپ یاخشىجا ایشینى گؤرسه
بئلیزده قوز اولماز٬ رنگیز ده سولماز
قارانلیقلار گئده ر٬ یوخسوللوق گئده ر
حیاتیز گول آچار٬ سولغونلوق قالماز
اوشاقلار گؤزله یین منى
یولدایام٬ گلیره م من سیزه سارى
حیاتیما معنا سیز باغیشلادیز
یاخچى دوغرولدایدیم اونو٬ من بارى
بیر گون چاتاجاغام گؤزله یین منى
آیاغیم چاتماسا٬ فیكریم چاتار كى
هئچ زامان دوشمنه ساتمارام سیزى
درین بؤیوك عئشقین٬ كیمسه آتار كى؟
گؤزله یین گلرم بیر گون یانیزا
هامىمیز بیرله شیب یولا دوشه ریك
محببتى و عئشقى بوتون ائللره
پایلاریق٬ هامىمیز گؤزه ل یاشاریق

دؤرد: ١٦ آذر-٥١ دالغا
----------------------------------------------------
اوشاقلیق عالمى ایدى٬ اوره ییم ایشیق ایدى
كیچیك٬ تمیز دونیاما٬ اویون یاراشیق ایدى
یولداشلاریم دؤورومده٬ هامىسى شاد٬ كینه سیز
بیر آن كوسو اولسایدى٬ گینه باریشیق ایدى

قارانلیق قورخمالى ایدى٬ آمما اوندان قاچمازدیق
گئجه لر ناغیللاردا٬ شیرین٬ تمیز محببت
بیزى باریشدیراردى٬ دئمك اونا گؤره ده
كؤنلوموزون قاپیسین٬ كینه لره آچمازدیق

ائله بیل گؤزلریمیز٬ گئجه لر ده گؤروردو
اولدوزلار٬ آى گونش تك٬ بیزه ایشیق وئره ردى
بیر بئله ایشیقینان٬ گؤیه بولوت گلسه یدى
گئچه رى كیچیك بولوت٬ گونون اوستون آلسایدى
بیلردیك گون چیخاجاق٬ بولوت دا قالمایاجاق
گئنه ده دسته له شیب٬ دؤزمه ییب باغیراردیق
گونشى نغمه لرله٬ قوناغا چاغیراردیق
"گونوم گئدیب سو ایشسین٬ آبى دونون دییشیسن"
…………
"گونوم! چیخ٬ چیخ!"

آیلار٬ ایللر دولاندى
زامان ناققا بالیق تك٬ اوشاقلیغیمى اوتدو
گئچه رى غملریمین٬ كیچیك سئوینجلریمین
یئرین بؤیوك كدرلر٬ گئچمز كینه لر توتدو
گونش بیزیم مملكتدن اوغورلاندى٬ توتولدو
ایستى٬ ایشیق چئشمه سى٬ پاك قورودو٬ قورتولدو

ایندى ایللردن برى٬ گئجه لریمى آىسیز
گوندوزلریمى گونسوز٬ باشا چیخاردیرام من
سویوق٬ نیفرت٬ آلدانمیش یوردوموزو بورویوب
شادلیغین٬ سعادتین كؤكو دیبدن قورویوب

هئچ زاد قارانلیق كیمى٬ منیم كؤنلومو سیخمیر
او دؤزمز اوشاقلیغیم٬ بیر آن یادیمدان چیخمیر
ایندى نئجه تابلاشیم بیر بئله قارانلیغا؟

داها دوشونوره م كى گونش تكجه بوردان یوخ
آیرى اؤلكه لردن ده٬ یامانجا اوغورلانیب

بونو دا دوشونوره م٬ گونشلرین دوستاغین
اوشاقلیقدا اوخویان نغمه لر ییخا بیلمز
او قارا دوستاقلاردا٬ یالقیز سس چیخا بیلمز

آتا بابا سؤیله ین٬ دمیر چاریق كؤهنه لیب
ایندى بو چتین یولدا دمیر آیاق لازیمدیر
دمیر عصا آتیلیب٬ ناغیللارا قاتیلیب
ایندى دمیردن توفنگ٬ حدسیز و حئسابسیز فیشنگ
خالقین سؤنمز عئشقیندن٬ بوردا دایاق لازیمدیر

هر كس گونشى سئوسه٬ بوتون سئوگىسین آتار
یورولوب یولدا قالماز٬ اؤزون ده یادا سالماز
اوزاق داغلار دالیندان٬ گئده ر گونشى تاپار

ایندى سوروشمالىیام٬ من گونشى سئویره م؟
من گونشى سئویره م!

بئش: پاییز ٥١ دالغا
----------------------------------------------------
گؤره سن اولار كى دؤرد ال آیاقلى
قیسسا آرزولارا٬ كیچیك وارلیغا
مؤحكم یاپیشیبلار٬ هئچ دوشونورلر
بؤیوك اینسانلارا٬ درین وارلیغا
دَیرلى یاشاییب٬ بؤیوك اؤلمه یه؟

آلتى: بهار ٥٢ . دالغا. به پنج شهید آرمان خلق
----------------------------------------------------
سحر سحر یوردوموزدان٬ قارانلیق گئجه قاچمامیش
هله گونش قیزیل ساچین٬ اوجا داغلاردا آچمامیش

بئش قهرمان٬ یاددا قالان٬ تاپشیریلدى جللادلارا
مینلر تمیز سئوه ن قلبه٬ ووردو جللاد درین یارا

تازا قانلار قورومامیش٬ گئنه تؤكولدو ناحاق قان بوردا
بو جور ایستى٬ قیرمیز قانلار٬ بزه ك وئریر بیزیم یوردا

سونسوز دوشمن٬ نئجه قانسین؟٬ ائللر٬ آزادلیق یولوندا
قانماز توفان بیله بیلمز٬ باهاردا٬ لاله فصلینده

بیر گول چمندن سولدورسا٬ مینلر تازا لاله لر آچار
بیر قهرمان شهید اولسا٬ مین اوره كدن قورخو قاچار

یئددى: پاییز ٥١
----------------------------------------------------
حقیقت اولدوزدان پارلاق
اوندان ایسه ایره لىدیر
اولدوز گؤره ن گؤزلریم
نئجه حقیقتى گؤرمز؟