قبریم اوسته اوخو

سانما بو آزاردان آییلان منی

او زامان كی، اجل گولوم سولدورار،

قبریم اوسته اوخو، آی اؤلن، منی

موژگان اوخون چك بیر- بیر آت سینه‌یه،

معشوق گرك عاشیقینی سینایه

دئمه گینن دخی گلمه سینایه،

ائده بیلمز سندن آیری "لن" منی

هئچ گؤروكمور شفا اوزو بو درده،

یوخ، عزیزیم، چاره یقین بو درده،

قویون، باری، جان تاپشیریم بو درده،

ایندی كی، بیلمیسیز آی اؤلن منی

عشق بو خرابی توتدو تابینا،

منی سالدین زولفون پیچ و تابینا،

قوربان اولوم اوره‌یینین تابینا،

بیر یادا سالماسان آی ایلن منی

زولفون بورج عقرب بنزر یوز آیه،

بئله گون وار برابردیر یوز آیه،

نباتی، چاره یوخ دئسن یوز آیه،

سانج اجاق بیلمیرم آی ایلن منی

نباتی