باخیش
یکشنبه 19 شهریور 1391
بؤلوم | یازار : ماكولو هاراي

غزللر


غزل ۱

اوزوك كيمي ايتيرميشم قاشيمي

تاپانميرام وفالي يولداشيمي

بولود قويور باشيني داغ چينينه

من قارا گون هارا قويوم باشيمي

ايسته ميرم ياريم گوروب اينجي يه

گيزله ديرم گوزومده گوزياشيمي

باشماق كيمين زيوار سيزام حيف اولا

تاپانميرام درديمه كفاشيمي

نقاش اولوب خيالينده چكيردير

اول دوداغ ، سونرادا گوز ـ  قاشيمي

رنگي قوتولدي بوشلادي طرحيمي

گورمه ديم اوندان سورا نقاشيمي

مسافر اولدوم حيف اولا تانيش يوخ

ايق داليمدا پيشيره آشيمي

-------------------------------------------------------------------------------------------------------

غزل ۲

يئنه غمخانه كيمين دير منه دونيا گئجه لر

سن كي يوخسان گؤره سن گؤزلري دريا گئجه لر

بير قارانليق كوچه دير ، بير باجادير ، بيرده منم

كيم بيله ر درديميزي همشه، يلدا گئجه لر

گؤزليم گؤزلريني اولدوز ائله گؤزلريمه

بلكه اولسون يوخومون كابوسي ، رؤيا گئجه لر

سن گئدندن سورا بير بوغضدي ساليب درده مني

گوزياشيمدان ائله ديم دردي مداوا گئجه لر

اوره ك اولدي پارالي ، گؤزلريم اولدي يارالي

يارادا هريارايا ائتدي مدارا گئجه لر

من پلنگ لر كيمينيديم آيين اون دورد گئجه سي

آيي اوخشاتدي سنه ائتدي تماشا گئجه لر

سئوگي نين معناسيني گئزمه اوره كلرده كي من

ائتميشم صبحه قدر سئوگيني معنا گئجه لر

-------------------------------------------------------------------------------------------------------

غزل ۳

دونيا منيلن ايسته مير بئش كلمه خوش دانيشا

هر گون كي عمريمدن كئچير بير داشدي كي دئير باشا

بيرجه منه دئسين بيري ، نيله ميشم بو خلقه من

هر كيمسه يولدان كئچينير منيلن ايستير ساواشا

قوش كيمينم كي روزگار ، قاناتلاريمي باغلييب 

عقيل دئير قوي باشووي ، آمما اورك دئير ياشا

نه وقته جاق يازيم يازي ، نه وقته جاق چاليم سازي

دنيزلي يم ، دنيزلي يم ، دا طاقتيم گليب باشا

ايسته ييرم بير قوش اولام ، قانات چالام هر طرفه

گئدم اوزاقلاردان ائدم گونلريمي بير تاماشا

-------------------------------------------------------------------------------------------------------

غزل ۴

گوزلـرون آخ نه گوزلديـر ، نه گوزل ، آي پاراسي

اوزي بير دونيا بوياغ ديرگوزوون آغ ـ قـاراسي

بو نـه گوزياشدي كي طوفانلي ائديب گوزلرووي

جـانيمـا دوشسـون اگر گوزلـروون وار قاداسي

دامجـي دامجـي ييقيليـر خيردا گوزه ، من نه دئيم

دنـيـزه بـنـزيـيــر آمـا ايـكـي كيپـريـك آراسي

ائلـه اولـدوز كيمـي گوزيـاشي يئره توكمه گوزل

ائلـه اولـدوزلارا ديـمـز گونـشـيـن گوشواراسي

آغلامـا ، بيـر بئلـه گوزيـاش ائله مه ، آرخايين اول

قويمارام سئل لره دوشسون گئنه ده ائل ساراسي

-------------------------------------------------------------------------------------------------------

غزل ۵
 
اونا خاطير اونا كن ايسته سه ، ايسته مه سه

يازيرام شعريمي من ايسته سه ، ايسته مه سه

آغليار قانلي بولود يازدا آيدين گوروشه

گويه رر داغدا چمن ايسته سه ، ايسته مه سه

دئميرم < سيز > آراميز بوندان آرتيغ سوسون

دئيرم ياريما < سن > ايسته سه ، ايسته مه سه

اوچدو بير گوش كيمي تك گله جك ، گلميه جك ؟

سپيرم دام داشا دن ايسته سه ، ايسته مه سه

--------------------------------------------------------------------------------------------

غزل ۶

ائله دولدي گوزومه آيريليغين غم قاني

قورخورام آغليام آخ قان گوتوره هر ياني

بئله باخما گوزومه خيردادي آمما دئمه لي

بير بولاغ دير كي اوزونده يئر ائديب درياني

ائله تئز تئز اوره ييم سينه ده چيرپير ديه سن

ايسته يير تيتره ده سينمده اورك دونياني

يئر - گوي آغز آچدي دئدي گلمه موغانه ساري

خان چوپان آغلا كي سئللر آپاريب ساراني


قايناق