پوخته اولماغا چوخ سفر گرگ

گئت دولانگیلن، خامسن هنوز

پوخته اولماغا چوخ سفر گرگ

مرغ قافیله همزبان اولـوب

دؤوره وورماغا بال و پر گرگ

كوه عشقه گل، گئتمه بی دلیل،

غول دنگ تك دوشـمه چوللره

تا كی سالیكه رهنمون اولا،

خیضـر ره كیمی راهبر گرگ

یوخ یالان دئدیم هرزه سؤیله دیم،

واضحین دئییم، دوغرو سؤیله ییم

حققه عارفی واصیل ائتمگه،

بیر دوداقلاری گول شكر گرگ

زولفی عنبرین خالی نازنین،

غنچه تك دهان، قاشی جان سیتان

شاه گولروخان، ماه بی قرین

نسترن كیـمی سیمبر گرگ

لاله تك أوزو آل یاناق اولا،

تازه گول كیمی تر بوخاق اولا

آغ آیاز أوزو آیدان آغ اولا

قاشلاری اونا هم سپر گرگ

همعینان اولا مهر و مار ایله

هم زبان اولا نور و نار ایله

زولفو بحث ائده شاهمار ایله

گنج سینه سی پر گؤوهر گرگ

حققه آشـینا، خلقـدن جدا،

ائیله میش اولا نفـی ماسوا

ترك ائده بوتون یاردان ادا

اول مسیح تك بی پدر گرگ

قویگیلن قدم دیره لاجرم،

نقش بوتده گور سیرر وحدتی

بو چگونه دن واقیف اولماغا

بیر جنون حق، مرد أر گرگ

آز دانیشگیلن، اولگیلن خمـوش،

ائتمه عالمی سیرر عشقی فاش

بوردا دورما چوخ، گئچ بو ورطه دن

بو مقوله ســؤز مختصر گرگ

منع قیلمایین چوخدا زاهیدی،

عذرو وار اونون، عاشیق اولماییب

او عبث یئره خلق اولونماییب،

باغبانه بیر كلّه خر كرگ

جد و جهد قیل، عارف اول، گؤزوم،

علم عشقدن اولما بی نصیب

جوم بو بحره بیر، تاپ او گؤوهری

عاشقم دئین ترك سر گرگ

راه پر خطر، بخت واژگون،

زولف یار تك شب سیاهگون

ایندی غئیبدن خان چوبانینا

نخل طوردن بیر شرر گرگ

هر خسیسه گل ائتـــمه التــجاءِ

اولماز اؤزگه دن حاجتین روا،

مشكول آچماغا شاه لافَتی

عنتر اولدورن شیر نر گرگ

بو جواهیرین یوخدو قیمتی،

آچگیلن گؤزوم یاخشی سئیر قیل

هر بیری ده یَر چین خراجینا،

موفته وئرمرم، سیم و زر گرگ

بیر گوزل جوان ایسترم، همان

كیم بو سؤزلری ائیله سین روان،

هاردا دیر دئسین بیر شكر زبان

كیم بو سؤز منه عامی تر گرگ

ساقی! گل منه جام عشقیدن

بیر كرم قیلیب اؤیله مست قیل،

تا دئسینله خلق لال اوتورماغا

بو نباتی تك بخته ور گرگ

سید ابوالقاسم نباتی